How a man schall be armyd at his ese when he schal fighte on foote

Hastings MS. [f.122b]
Middle English
He schal have noo schirte up on him but a dowbelet of ffustean lynyd with satene cutte full of hoolis. The dowblet muste be strongeli boude there the poyntis muste be sette aboute the greet of the arme. And the b ste before and beyhnde and the gussetis of mayle muste be sowid un to the dowbelet in the bought of the arme. And undir the arme the armynge poyntis muste be made of fyne twyne suche as men make stryngis for crossbowes and they muste be trussid small and poyntid as poyntis. Also they muste be wexid with cordeweneris coode. And than they woll neythirrecche nor breke. Also a payre hosyn of stamyn sengill and a peyre of shorte bulwerkis of thynne blanket to put aboute his kneys for chawfygeof his ligherness. Also a payre of shone of thikke cordwene and they muste be frette with smal whipcorde thre knottis up on a corde and thre coordis muste be faste sowid un to the hele of the shoo and fyne cordis in the mydill of the soole of the same shoo and that there be between the frettis of the heele and the frettis of the myddill of the shoo the space of thre fyngris.

To arme a man

ffirste ye muste sette on Sabatones and tye hem up on the shoo with smale poyntis that wol breke. And then griffus and then quisses and the breche of mayle. And the tonletis. And the brest. And the vambras. And then glovys. And then hange his daggere upon his right side. And then his shorte swerde upon the lyfte side in a rounde rynge all nakid and pylle it oute lightli. And then putte his cote upon hos bak. And then his bascincet pynid up on two greet staplis before the breste with a dowbill behynde up on the bak for the make the bascinet sitte juste. And then his long swerde in his hande. And then his pensill in his hande peyntid of seynt George or oure lady to blesse him with as he gooth towarde the felde and in the felde.

The day that the Pelaunt and defaundaunt shal fighte what they shal have with hem in the felde

A tente muste be pight in the felde
Also a cheyre
Also a basyn
Also vj loves of breed
Also ij galones of wyne
Also a messe of mete flesshe or fisshe
Also a borde and a peyre of trestelis to sette his mete and drynke on
Also a borde clothe
Also a knyf for to cutte his mete
Also a cuppe to drynke of
Also a glas with a drynke made
Also a dosen tresses of armynge poyntis
Also an hamyr and pynsones and a bicorne
Also a smale nayles a dosen
Also a spere a longe swerde shorte swerde and dagger
Also a kerchif to hele the viser of his bascinet
Also a pensell to bere in his hande of his avowyre